తే. గీ. నీవు కల్పించునిద్రలోనే గతించు
జీవితము కొంత – పరులకు సేవచేయు
టందు వ్యాధుల దుఃఖములందు కొంత
ఇంక నీసేవ కావకాశ మేది ? స్వామి !
తే. గీ. నీవు చైతన్యమూర్తివి – నీ వెవనికి
ద వ్వవుదొ వాని కిక జీవితమ్మె లేదు !
నీదయకు నోచుకొన్నవానికి సమస్త
కాంక్షితమ్ములు కొంగుబంగారమె కద !
తే. గీ. గాలి పోగానె మట్టిలో కలసిపోవు
జాలిబ్రతు కిది; దీనికై గాలిమేడ
లెన్ని కట్టిన నన్నియు నిట్టె కూలు !
జాలిపడి లాభ మే ? మిది గాలిబ్రతుకు !
తే. గీ. ఆర్ద్ర మౌనామనస్సున నధివసించు
కృష్ణమేఘ మూపిరిగాలికే చలించి
కదలిపోవునొ యేమొ ? అన్‌బెదరుతోడ
ఊపిరిని పీల్ప జంకెద నొకొకసారి !
తే. గీ. తనకు నాత్మీయు లందఱు దవుల నిలువ
తనకు తెలియనితరు వెదో తరలి వచ్చి
కాటిలో తనతో చితిన్ కాలిపోవు !
ఎవరెవరి కేది ఋణ మన్న దెఱుగరాదు !
తే. గీ. కలల కర్థ మేమి ? కల యేమి ? కలలోన
మేలుకీడులందు మెలగు టేమి ?
విలువ యింత లేనికలవంటీ బ్రతుకున
కర్థ మేమి ? ఆరహస్య మేమి ?
తే. గీ. రెప్ప లార్పక నిన్ను దర్శింప గోరి
యెదురు చూతును నీకయి యేండ్లు పూండ్లు;
స్వామి ! ఒకసారి కన్పింతువా – కల వని
చాటెద జగాన పారవశ్యమ్ముతోడ.
తే. గీ. పాము పాన్పు నీకు – పక్షి వాహన మటే !
పాము పక్షి పుణ్య మేమి చేసె ?
నరుడ నై జనించునాకన్న నవి యెట్టు
లధిక మయ్యె నయ్య ! అబ్జనాభ !
తే. గీ. ఏమి పుణ్యము చేసెనోయీ మయూరి ?
పింఛమున్ తల దాల్తువు వేడ్కతోడ !
గుండె పగిలినవెదు రెప్డు కొలిచె నిన్ను ?
వేణువుగ చేసి ధరియింతు పెదవులందు !
తే. గీ. రసజగత్సృష్టికర్తను లలితకవిని
నేను కవిచక్రవర్తిని – నీదుస్నుషకు
పుత్తృకుడను – రసస్వరూపుడవు నీవు;
నేను పైవాడనా ? స్వామి ! నీవె చెపుమ.
తే. గీ. పద్మముఖి పద్మ పద్మజ పడతి యంట !
పద్మజుడు నీకు గారాబుపట్టి యంట !
పద్మశరు డొక్కకొడు కంట పద్మనేత్ర !
పద్మ మన నింతమో జేమి ? పద్మనాభ !
ఆ. వె. శ్రీనివాస ! మాకు చెంపకు చేరెడు
కన్ను లిచ్చినావు – కంట బడవు !
నిన్ను చూడలేనికన్ను లి వేలరా ?
సారసాక్ష ! సూర్యచంద్రనయన !
ఆ. వె. నరులకంట పడవు నను గన్ననాస్వామి !
ఏమి చేయు నరులదృష్టి నిన్ను ?
దృష్టిదోషమునకు దేవుడే భయపడ్డ
ఇంక బెదురు లేని దెవరి కంట ?
తే. గీ. ఒకమహాభావకుం డైనసుకవిచూపు
దరు లొరసి సత్యలోకము దాటిపోవు !
విశ్వమును మాయతో మభ్యపెట్టగలవు –
కవులకను గప్పి యెందు పోగలవు నీవు ?
ఉ. కన్నులలోనివెల్గు వయి కాంతికి శాంతికి కేంద్రబిందు వై
అన్నములోనిశక్తి వయి ప్రాణమ వై వెలుగొందుదే ప్రభూ !
ఉన్న దొకయొకండ వయి ఊపిరి వై అలచందమామలో
వెన్నెల వై జలంబ వయి వెల్గుదయామయ ! నీ కివే నతుల్.
తే. గీ. కంట పూవులు విరియునీకరుణచేత
నిలిచి వలపులమేడలో కులికినాను !
ఇంతలో విడదీయుదే యింటి నుండి ?
స్వామి ! నీగుండె అది పెద్దబందఱాయి !
తే. గీ. నన్ను సృష్టించినావుపో – ఉన్నవాని
నుండనీయక ఆల్బిడ్డ్ లుస్సు రనగ
ఏల మ్రందింతు ? దాన నీ వేమి బావు
కొందు మాయుసురులు పోసికొనుటెకాక ?
కం. పచ్చనిపూవుందోటను
చి చ్చిడుదురె ? బ్రతుకు లిట్లు చెడగొట్టెదరే ?
ముచ్చటలా యీహత్యలు ?
పచ్చిదగా – జీవహింస పాపముసుమ్మీ !
తే. గీ. నీవు సృష్టించుప్రాణుల నీవె చంపు
దిట్టివాడవు దేవుడ వెట్టు లైతి ?
ఈశుడవు కావు – మఱి జీవితశ్వరుడవు !
యముడ వనుపేరు నీపట్ల సార్థకమ్ము !
తే. గీ. తను వశాశ్వత మని నిరుత్సాహపడను !
పాంచభౌతిక మనియును బాధపడను !
నశ్వరశరీరమును సాధనముగ చేసి
నేను రచియింతు శాశ్వత మైనకళను !
తే. గీ. అక్షరాక్షరమధురభావాంబరమున
ఏబదేండ్లుగ నేను రచించుకొన్న
మహితరసలోకరమ్యహర్మ్యమ్ములందు
నే వసింతును – చావు న న్నేమి చేయు ?
తే. గీ. తనువె తా నన్నభ్రాంతిలో తగులుకొన్న
జీవు డఙ్ఞాని యై యుండు చివరివఱకు;
అత డెఱుంగడు కంట పడ్డట్టీ దెల్ల
నీఱుగా మారు ననుపచ్చినిజ మొకండు !
తే. గీ. లోకమే మిథ్య యందురు; లోకమందు
సౌఖ్యములకోస మఱ్ఱులు చాచుచుంద్రు;
సుఖము మిథ్య కాదా ? యని చూడ రేమి ?
ఏమివేదాంతమో యిది యెఱుగరాదు !
తే. గీ. “ అన్నమైనను ఒక్కటే – సున్నమైన
నొక్కటే ” యని – అన్నమే మెక్కుచుంద్రు !
ఇట్లు పొసగనిమాట లేవేవొ చెప్పి
వంచకులు లోకు వౌదురు ప్రజలముందు !
తే. గీ. సాలెపురువునుండి సాలెగూడువిధాన
ఈశునుండి పుట్టు నీజగాలు !
నారికేళజలము నశియించువిధముగా
ఈశుననె లయించు నీజగాలు !
తే. గీ. ఎక్కడికి పోవుచున్నామొ యెఱుగరాని
ఒంటరిప్రయాణ మిది ! జీవు డొంటరిగనె
ఉండుట భయంకరము – మఱి ఉర్విమీద
జంటతో కూడి బ్రతుకుటే సౌఖ్యదమ్ము !
తే. గీ. నీవు సూదంటురాయివి – ని న్నెఱుగని
జీవరాశి నాకర్షించి నీవయిపుకు
కరుణతో వారికిం దగుఙ్ఞాన మొసగి
తుదకు నీలోన చేర్చుకొందువు మహాత్మ !
తే. గీ. గాలి నై యెన్నిలోకాలొ కలయ దిరిగి
వచ్చి పడితిని భూమిపై వానవోలె !
నీవు పంపినకబురు నన్ చేరగానె
స్వీయజనముకైనను జెప్పకుండ
వణకుచున్ దేహ మిక్కడ పాఱవైచి
రెక్కలను గట్టుకొని వత్తు దిక్కుమాలి !
తే. గీ. కాంత తనువున నర్థభాగమ్మునందు
నంటిపెట్టుక యున్నవా డనవరతము
యోగివలె వల్లకాటిలో నుండవక్చు !
నింతకన్నను యోగ మిం కెందు గలదు ?
తే. గీ. గాలి తనువును వీడిపోగానె మహిని
నీవు కూర్చినబంధము లేమి యవునొ !
బంధములు వీడ నెవరి కెవ్వరునుగారు !
వసుధలో జీవితము గాలిబ్రతుకు కాదె ?
తే. గీ. తానె దేవుడ ననుయదార్థమ్ము మఱచు
జీవు డఙ్ఞాని యై నిన్ను చేరలేడు !
మఱపు గలవాడు గెలుచునే మఱి పరీక్ష ?
ఆత్మవిఙ్ఞాన మబ్బెనా – అతడె నీవు !
తే. గీ. హరివొ ? హరుడవొ ? నీ వుండునట్టీతావు
వెండికొండయొ ? తిరుపతికొండయొకద ?
నవనవం బైనకవితలన్ పరిమళించు
ఈమనఃపద్మమున నివసింప వోయి !
కొండ యేటికి ? బంగారుకొండ ! నీకు.
తే. గీ. మహిపయిన నిన్నికోట్లబొమ్మలను పోత
పోసి అలసితివా ప్రభూ ! భువనవంద్య !
జీవరాశి నేమట్టీతో చేసినావొ
విప్పి చెప్పు మీమర్మమున్ విశ్వశిల్పి !
తే. గీ. ఒక్కసూర్యుం డనేకసూర్యులుగ వేఱు
వేఱుమూకుళ్ళనీట కన్పించునట్లు
కానిపింతు వనేకులుగా ననేక
దేహముల నీ వొకండవు దేవదేవ !
ఉ. ఆరనిచావుపుట్టువుల కవ్వలిగట్టున నున్న నీవు సం
సారనిమగ్నజీవులను చల్లనిచూపుల చూడకున్నచో
వారియనంతయాత్ర కొకపారము కల్గునె ? ఓదయామయా !
వారిదురంతదుఃఖ మిది పాయుట యెన్నడు జీవితేశ్వరా !
తే. గీ. ఒకకొడుకు వెదజడుడు – వేఱొక్కకొడుకు
పిచ్చిగా కాముకత్వము రెచ్చగొట్టు;
తిరుగుబో తట యిల్లాలు – తిరిపె మెత్తు
నర్థనారీశుబ్రతు కెంతహాయి ! చూడు.
తే. గీ. తరుణికోపమ్మునకు నీవె తాళలేక
అడుగులం బడినా వటే అబ్జనాభ !
అట్టిచో నింతి అలిగి మూడంకె వేయ
ఉర్వి మామూలుమగ డెట్టు లోర్వగలడు ?
తే. గీ. అంద మైనట్టిదృశ్యము లరయువేళ
వేయికనులును చాల వన్పించునపుడు
కన్నులకు రెప్పపా టడ్డు కాదె చెపుమ ?
రెప్పపా టేల పెట్టితి శ్రీశ ! మాకు ?
తే. గీ. మాఱు కలకండగా పంచదార బెల్ల
ములుగ చెఱ కొక్క టయ్యు – నట్టులనె స్వామి !
వేఱువేఱురూపములందు పేరులందు
కదలియాడెడునాత్మ యొక్కటియె కాదె ?
ఆ. వె. మఱచిపోయినాము మాచిరునామాలు
దారి తప్పుబాటసారులు మయి !
పొసగుదారి చూపి పుణ్యము కట్టుకో;
ఈవు కాక మాకు నెవరు దిక్కు ?
తే. గీ. స్వప్నమందలిదృశ్యముల్ సత్యమైన
సంఘటనలట్లు తోచు నాక్షణమునందు !
చిన్నకల యది యైనచో – జీవితమ్ము
చిత్ర మౌపెద్దకలకదా జీవితేశ !
తే. గీ. నీవు జ్యోతిర్మయుండవు; నీవెలుంగు
లోకముల కెల్ల వెలుగు – నీలో వెలుంగు
లోకముల కెల్ల వెలుగు – నీలోన నుందు
నేను – నాలోన నీ వుందు నిర్మలాత్మ !
చ. అవధులు లేనికూర్మి నను నాదర మొప్పగ చూచి నన్ మహా
కవిగ సృజించినావు; మఱి కానుకపెట్టెద నీకు నాకృతిన్;
అవధులు లేనివెల్గ వయి అందఱిడెందములందు నిండునీ
వెవరికి నే మొసంగెదవొ యెవ్వ డెఱుంగునురా దయామయా !
తే. గీ. ఆత్మయందు ప్రవేశించెనా మనస్సు
విషయభోగములందు నపేక్ష కనదు !
పాలలో నుండి మఱి వేఱుపడిననేయి
తిరిగి పాలలో కలియునే దేవదేవ !
తరువాయి వచ్చే సంచికలో…….
*****************************************************************