11_002 హాస్యగుళికలు – ఆవకాయ పెట్టాలా ? వద్దా ?

11_002-09

.

అత్తగారు:

ఏడుకొండలవాడ గోవిందా రామ

ఎత్తుకెళ్ళు నన్ను గోవిందా రామ

స్వర్గానికెళ్ళాక గోవిందా రామ

పులిహోర చేస్తాను గోవిందా నీకు

పులిహోర చేస్తాను గోవిందా

.

కొడుకు: అమ్మా, ఇవేం గోవింద నామాలే, కొత్తగా ఉన్నాయి?

.

కోడలు: ఆఁ, మీ అమ్మ స్పెషల్ గా రాసిన గోవింద నామాలు!

.

కొడుకు: ఆఁ, గోవింద నామాల్లో కూడా తిండి గొడవేనా?

.

కోడలు: ఆవిడకి భక్తి భుక్తి యావ కూడా ఎక్కువే.

.

అత్తగారు:

మేకలాంటి కొడుకు గోవిందా రామ

పులిలాంటి కోడలు గోవిందా రామ

నేనంటే పడదు గోవిందా రామ

ఎడ్డేమంటే తెడ్డెం గోవిందా రామ

మొన్న పక్కింటి పిన్నిగారిచ్చిన ఆవకాయ తిన్నావా?

.

కోడలు: ఆఁ తిన్నాను. భలేగా ఉంది.

.

అత్తగారు: ఆఁ ఏం బాగులే.. నా మొహంలా ఉంది. గొడ్డు కారం. కొంపదీసి నా కొడుక్కి పెట్టావా ఏం?

.

కోడలు: ఇంకా లేదండీ. ఇవాళ పెడతాను.

.

అత్తగారు: అస్సలు పెట్టద్దు. ఈసారి నేనే ఆవకాయ పెడతాను.

.

కోడలు: మీరా!? ఎందుకొచ్చిన ఆవకాయండీ? ఇంట్లో అందరికీ బీపీలు, కొలెస్ట్రాలు. డాక్టర్ ఊరగాయలే తినద్దన్నాడు. ఇంక ఆవకాయ పెట్టడమెందుకు?

.

అత్తగారు: ఆఁ, నీ చేతి వంట తినలేక ఛస్తున్నాను. కూరలో ఉప్పు ఉండదు, పచ్చట్లో పులుపు ఉండదు, పులుసులో ముక్కలుండవు, చారులో ఘాటు ఉండదు. నా నాలుక చచ్చిపోయింది. నా నోటికి కాస్త ఆవకాయ తగిలిస్తే గాని ప్రాణం లేచిరాదు.

.

కోడలు: ఎందుకండీ ఒళ్ళు పాడు చేసే ఆవకాయ మీద అంత మోజు? తాజాగా రోజుకొక పచ్చడి చేసుకొని హాయిగా తినచ్చు కదా?

.

అత్తగారు: ఆఁ ఏం పచ్చడిలే. నువ్వు చేసేది కొత్తిమీర, కరివేపాకు, పుదీనాలేగా?

.

కోడలు: వాటిల్లోనే ఉన్నాయి విటమిన్లు. అవి తింటే రుచికి రుచి ఆరోగ్యానికి ఆరోగ్యం.

.

అత్తగారు: బాగుందే వరస. మన పెద్దవాళ్ళందరూ ఆవకాయ తినేగా దిమ్ము దిమ్మని తిరిగింది!? నువ్వు చేసే పచ్చళ్ళు తినే మీకు ఊఁ అంటే నీరసం ఆఁ అంటే నీరసం. ఆ కాలంలో ఉండేవా ఈ బీపీలు, షుగర్లు? ఎంతెంత తినేవాళ్ళం!

.

కోడలు: ఎందుకు లేవు? మీకు పేర్లు తెలిసేవి కావు. అంతే. ఇప్పుడున్న జబ్బులన్నీ అప్పుడు కూడా ఉండేవి. నెలల తరబడి మంచాన పడేవాళ్ళు కాదా? కోడళ్ళు చచ్చీ చెడీ చాకిరీ చేసేవాళ్ళు కాదా? ఆడపడుచులు తళుగ్గా వచ్చి అమ్మని పలకరించి మింగిపోయేవారు కాదా!?

.

అత్తగారు: ఊరికే అన్నారా పెద్దలు.. పుణ్యం కొద్దీ పురుషుడు ఖర్మ కొద్దీ కోడలు.. అని!

.

కోడలు: నామీద కోపంతో సామెతలు మార్చేయకండి.

.

అత్తగారు: నేను మొదట్నుంచీ చెబుతూనే ఉన్నాను. కయ్యాల వారి ఇంటిపేరు గల అమ్మాయి వద్దురా… అని. వింటేనా?

.

కోడలు: జగడాల జగదాంబ కొడుకుని చేసుకోవడం మా అమ్మకీ ఇష్టం లేదు. ఓ సుఖమా? సంతోషమా? ఒక సరదానా పాడా? వంటింటి కుందేలునైపోయాను. ఎంతసేపూ మింగబెట్టడమే నా పని.

.

అత్తగారు: ఔనే, తింటాను. నా కొడుకు సంపాదనేగా? నువ్వెవత్తివే అడగడానికి? ఇంత తింటున్నాను కాబట్టే నీ కిట్టీపార్టీ స్నేహితుల్ని మేపుతున్నాను.

.

కోడలు: నేనడిగినప్పుడు ఒక్కసారైనా చేశారా? మీకు మూడొచ్చినప్పుడు ఒక్కసారి పకోడీలు చేశారులే మహా. జన్మంతా దెప్పుతూనే ఉన్నారు.

.

అత్తగారు: ఏది ఏమైనా సరే, నేను ఆవకాయ పెట్టి తీరతాను. ఎవరడ్డమొస్తారో చూస్తాను. (ఇంతలో కొడుకు వస్తాడు.)

.

ఒరేయ్ మాధవా!

.

కొడుకు: ఏమ్మా?

.

అత్తగారు: బజారు నుంచి ఐదొందల కాయలు కొట్టించి పట్టుకురా.

.

కొడుకు, కోడలు ముక్త కంఠంతో ఒకేసారి: ఐదొందల కాయలే!?

.

అత్తగారు: ఔను. నా అక్కచెల్లెళ్ళకి, నా అన్నయ్యలకి, పక్కింటి పిన్నిగారికి కూడా ఇవ్వాలి కదా. అసలు ఐదొందల కాయలు చాలా అని నేనాలోచిస్తుంటే?

.

కోడలు: ఆలోచిస్తారు. తేరగా వస్తే వెయ్యి కాయలు కూడా పెడతారు.

.

అత్తగారు: అవునే, పెడతాను. నీ బాబు సొమ్మేం కాదు. ఇస్తానన్న కట్నానికే గతి లేదు.

.

కోడలు: విన్నారా మీ అమ్మగారి మాటలు? ఆనాడు ఆదర్శం ఆదర్శం అంటూ కట్నం తీసుకోకుండా మా నాన్న చేతులు కట్టేశారు. మీ అమ్మకి సర్దిచెప్తానని పెళ్ళి చేసుకున్నారు. కానీ ఈరోజు వరకు మీ అమ్మగారి నోరు కట్టేయలేకపోయారు.

.

కొడుకు: ఎందుకమ్మా ఈ రాద్ధాంతం? వదిలేయ్.

.

అత్తగారు: నేను వేసే కొత్తావకాయ ఖర్చుతో మీ ఆస్తి తరిగిపోతుందని మీ ఆవిడ తెగ బాధపడిపోతోంది. నీ డబ్బు ముట్టుకుంటే ఒట్టు. నాకు నా పుట్టింటివారు ఇచ్చిన స్త్రీ ధనం ఇంకా ఎంతోకొంత ఉందిలే. దానితో ఆవకాయ పని కానిచ్చేస్తాను.

.

కోడలు: నేనెందుకు చెపుతున్నానో అర్థం చేసుకోరేం? పోయినేడాదే కదా ఆవకాయ తినేసి మంచాన పడ్డారు! బాధ పడింది మీరా నేనా! ఇప్పుడు మళ్ళీ ఆవకాయ అంటారేంటి?

.

అత్తగారు: అవునే, అంటాను. ఒక్కసారి కాదు. వందసార్లంటాను. ఇదే నాకు ఆఖరేడాది.

.

కోడలు: ఆఁ, ఈమాట నేను కాపురానికొచ్చినప్పట్నుంచీ చెప్తూనే ఉన్నారు. నేనూ వింటూనే ఉన్నాను.

.

కొడుకు: మహాప్రభో, ఇక ఆపండి! నాకు ఆఫీసుకు టైమవుతోంది. అమ్మా, నీకు ఆవకాయేగా కావలసింది? నేను ఆఫీస్ నుండి వస్తూ రెడీమేడ్ ఆవకాయ సీసా పట్టుకొస్తాను. సరేనా?

.

అత్తగారు: సరేలే. అదేదో తెచ్చి తగలేయ్.  మీ ఆవిడ దెప్పిపొడుపులతో నా ఆవకాయకి దిష్టి కొట్టింది. ఇహ ఆవకాయ పెట్టినట్టే!

.

కోడలు: ఆ తెచ్చేదేదో సాల్ట్ లెస్, ఆయిల్ లెస్ ఆవకాయ చూసి తీసుకురండి.

.

అత్తగారు: ఉప్పు తక్కువావకాయలు, బుద్ధి తక్కువావకాయలూ నాకక్ఖరలేదు. దాని బదులు ఆ పుదీనా, కరేపాకు పచ్చళ్ళే నా మొహాన కొట్టండి. (అంటూ విసురుగా అక్కడి నుంచి వెళ్ళిపోతుంది.)

.

కొడుకు: (ఆఫీస్ కి వెళ్ళిపోతాడు.)

.

కోడలు: హమ్మయ్య. ఈరోజుకి గండం గడిచింది. రేపు ఇంకేం భాగవతం మొదలవుతుందో!? (శ్రోతలతో/ ప్రేక్షకులతో) మా ఇంటి భాగోతం విన్నారు కదా. మీరే చెప్పండి. ఆవకాయ పెడదామా వద్దా? 

.

———-(O)———-

You may also like...

Leave a Reply

Your email address will not be published. Required fields are marked *