ఎక్కడ సీత ! లగ్నమున కెల్లరు వచ్చిరయోధ్యయెల్లత
క్రిక్కిరిసేన్ గదామిథిల ! కీర్తి కిరీటము దాల్చి రూపు పెం
పెక్కగ నిల్చె ఆ దశరధేశ్వరు డల్లదె, ఎంత పుణ్యమో
దక్కెనునాకు ! రాఘవుని ధారగ మారును సీత ఇంతనే !
కడుపున పుట్టలేదు; తమకంబున ఏ పురుటింటి వాకిటన్
గడపను దాటి చూచుటకు కన్నులు పెద్దవి చెయ్యలేదు, మా
పొడి పొడి జీవితంబులను పున్నమి వెన్నెల ముంచిపోవగా !
పుడమిని పుట్టినావు కద ! పుత్రిక వైతివి ఎంతభాగ్యమో !
నిన్నొక ఇంటి కోడలుగ నిస్తుల తేజ విరాజ సంపదన్
కొన్నవకంబు కూర్పగల గొప్పకులంబది యెద్దియంచు ఏ
నెన్ని విధంబులో తలచి ఈశ్వర చాపము త్రుంచువారికే
కన్నియనిత్తునంటి రఘుకాంతుడు తానయివచ్చెనల్లుడై
రాజమందిరమెల్ల పూజాలయమ్ముగా, రూపొంద చేసె నీపాపవచ్చి
హలమును చేపట్ట శ్రీలక్ష్మి వుదయింప, పొలమెల్ల క్షీరాబ్ధి పొంగులీనె
ఎదురైన యపుడెల్ల పదములు మొక్కంగ, కన్నులు పన్నీటి కాల్వలయ్యె !
కడుపు పండక సంతాన కాంక్ష తీర
నెంతో కుందెడు మనసుల ఎట్లో తిరిగి
తల్లి భూదేవి కరుణించి మల్లెపూవు
నొకటి దోసిట వైచె జయోత్సవముగ !
వెనుకటి జన్మమందు మరి వేల్పుల నెవ్విది మ్రొక్కినానో తా
తనయగ వచ్చె లక్ష్మి తెలితామర గద్దెగ మారె జన్మముల్
జనకుడుగా తరించుటకు చాలకపోయెనో పుణ్యమంతయున్
జనకుని రూప ధారణకు చాలెను సుప్రీతి అంతె చాలులే !
ఈవేళ ఈపూటే ఇక్ష్వాకులింటికి
పయనమైపోవు నా ప్రాణపుత్రి
రఘురామ నీడగా, రతనాల మేడగా
మహలక్ష్మి మా తల్లి మారిపోవు
వెదురువనము బోలె వేణువు లూదెడు
పిలగాలి తరగలు నిలిచిపోవు
పెరిగిన ముచ్చట తరగని ప్రేమలు
అత్తవారికి నేడు అంకితమ్ము
అమ్మ ! జానకీ ! నాతల్లి ఆడపడుచు
జంటకన్నుల వెన్నెల – పంటపొలము
చేతికందించి పోయిన జీవకళిక
సీత మము వీడి చను పరంజ్యోతి వోలె !
👉🏾 ఈ అంశం పైన మీ అభిప్రాయాన్ని క్రింద వున్న Leave a reply box లో వ్రాయండి. 👇🏾
——– ( 0 ) ——-
Please visit this page