ఆగండమ్మా ! చుక్కలూ !
పయన మాపం డమ్మా చుక్కలూ !
సరదాకబుర్లు మాతో చెబుతూ
సాగం డమ్మా ! అక్కలూ !
మేము నిదుర పోయేవేళా !
మీరు వచ్చి పోతుంటారు !
మేము నిదుర లేచేసరికే
మీరు నిదుర పోతుంటారు !
సూర్యు డంటే మీకు భయమా ?
చంద్రు డంటే మీకు ప్రియమా ?
సూర్యుడు మి మ్మేం చేశాడు ?
చంద్రుడు మీకే మిచ్చాడు ?
పగ లంతా తెగ నిద్రపోయినా
ఒళ్ళు బలవడం లే దేమీ ?
రాత్రి మంచులో అలా తిరిగినా
రొంప పట్టడం లే దేమీ !
నీలినీలిఆకాశపుతెరపై
నిలిచీ నిలవనితారల్లారా !
పరువము లొలికేనందనవనిలో
వలపులు కులికే పువ్వుల్లారా !
అందీ అందని ౘందమామనే
అందుకొనా లని చూస్తా రేమీ ?
మీజత కోరేమమ్ము కా దని
మింటిదారినే పోతా రేమీ ?
మఱియొకతారను వలచినచంద్రుని
మామా ! మామా ! అంటా రేమీ ?
ఎవ్వతెకన్నులకాటుకనలుపో
ఈతనిమొగమున కనుగొన రేమీ ?
ఆగం డమ్మా ! చుక్కలూ !
సరదాగా మామాటలు విని మఱి
సాగం డమ్మా ! అక్కలూ !
——- ( 0 )——–
👉🏾 ఈ అంశం పైన మీ అభిప్రాయాన్ని క్రింద వున్న Leave a reply box లో వ్రాయండి. 👇🏾