.
పండగ రావాలి !
.
ఆదిత్యుడు తన కిరణాలను పదునెక్కించుకొనేందుకు ఉత్తరాయణానికి ఆయత్తమవుతున్నాడు.
హేమంతం తన చలి తలంపుని తనలోనే దాచుకొని బిరబిరమంటూ హిమవన్నగాలలో తలదాచుకుంది.
.
ఇళ్ళముంగిట్లో భోగిమంటలొక పక్క
భోగంచేయించుకుంటున్న శ్రీనివాసుడు, పాశురాలకి పరవశించిన
అమ్మ పౌష్యలక్ష్మి గోదాదేవిల మందస్మితాలొక పక్క,
.
పరమశివునికి క్షీరాభిషేకములొక పక్క
నారాయణ స్మరణలతో హరిదాసులొక పక్క,
.
పంట చేతిలోపడ్డ రైతన్నల చిరునవ్వులొక పక్క,
వనదేవత చేమంతుల, బంతుల మరువపు సౌగంధములతో సింగారమొక పక్క,
.
గోమాతలని కొలిచే భక్తులొక పక్క,
తీర్చిదిద్దిన రంగవల్లులతో రూపుమార్చుకొన్న భూమాత ఆనందం ఆవర్ణమొకపక్క
.
కొత్త అల్లుళ్ళకి ఆతిధ్యపు ఆర్భాటములొక పక్క,
పల్లెసీమల్లో నైవేద్య భోజ్యములు స్వీకరిస్తు దీవెనలిస్తున్న గ్రామదేవతలొక పక్క
.
కమ్మని పిండివంటల ఘమఘమలతో
అసలైన నిజమైన పండగ రావాలని ఆశతో !
.
****************************************